Broadcasted on May 27, 2024 (Monday) on MRT1 at 20.15. Во пресрет на конститутивната седница на Собранието, во „360 степени“ на МРТ 1 гостува Билал Касами, претседател на политичката партија Движење Беса и еден од предводниците на коалицијата ВЛЕН или „Вреди“, која ќе биде дел од новата влада. Според новиот Деловник за работа на Собранието, конститутивната седница може да трае најмногу три дена и мора да заврши со избор на претседател на парламентот. На таа позиција ќе седне кадар на ВЛЕН, а едно од прашањата до Касами е дали може да потврди оти тоа ќе биде Африм Гаши, претседателот на Алтернатива. Со Касами разговараме за распределбата и на другите ресори во првиот ешалон од власта, како и за тоа дали е усогласена програмата за работа на новата влада и кои од предизборните заложби на ВЛЕН ќе бидат дел од неа. Лидерот на Беса потврдува дека во ВЛЕН не се заинтересирани за министерството за односи меѓу заедниците (сега Министерство за политички систем и односи меѓу заедниците), познато како министерството на Артан Груби – па, прашањето е зошто. Тема во интервјуто се и уставните измени за внесување на Бугарите, како и реотворањето на прашањето за името со одбивањето на претседателката на државата и на лидерството на ВМРО-ДПМНЕ усно да го користат уставното име – Република Северна Македонија.
